Հնդկաստանի ԱԳ նախարարն առաջին անգամ Վրաստան է այցելում

Հնդկաստանի արտաքին գերատեսչության ղեկավարն առաջին անգամ պաշտոնապես այցելում է Վրաստան. հուլիսի 9-10-ը Սուբրամանյամ Ջայշանքարը Թբիլիսիում հանդիպելու է նախագահ Սալոմե Զուրաբիշվիլիի, վարչապետ Իրակլի Ղարիբաշվիլիի, փոխվարչապետ, արտգործնախարար Դավիդ Զալկալիանիի և էկոնոմիկայի նախարար Նաթիա Թուրնավայի հետ:

Հնդկաստանի ԱԳ նախարարը Վրաստանին է փոխանցելու միջնադարյան Քեթևան թագուհու մասունքները, ով վրաց ուղղափառ եկեղեցու կողմից դասվել է սրբերի շարքին և համարվում է քրիստոնեական նահատակ: Հանդիսավոր արարողությունը կայանալու է Թբիլիսիի Սուրբ Երրորդության Մայր տաճարում (Սամեբա):

Վրաց արտաքին գերատեսչության հաղորդմամբ` Դելիի կողմից մասունքի փոխանցումն աննախադեպ որոշում է: Առկա կարգերի համաձայն` Հնդկաստանը չի դիտարկում այլ երկրին պատմական հուշարձանների և սրբությունների փոխանցում, որոնք հայտնաբերվել են իր տարածքում հնագիտական պեղումների ժամանակ:

Նշվում է, որ առկա բարյացկամ հարաբերություններից, փոխադարձ աջակցությունից և սերտ համագործակցությունից ելնելով` Հնդկաստանի վարչապետն աննախադեպ որոշում է ընդունել Քեթևան թագուհու մասունքները Վրաստանին հանձնելու վերաբերյալ:

Քեթևան Բագրատունին եղել է Կախեթի թագավորության թագուհին, ում 1614թ. գերեվարել է պարսից Աբաս 1-ին շահը: Սպահանում նրան թոռների` Ալեքսանդրի և Լևանի հետ նետել են զնդանը, որտեղ մնացել է 10 տարի: Պատմում են, որ շահը խոստացել է նրան Պարսկաստանի թագուհի կարգել, եթե իսլամ ընդունի: Չնայած տառապանքներին, թագուհին հավատքը չի ուրացել: 1624թ. սեպտեմբերի 13-ին Քեթևան թագուհուն այրել են:

Պորտուգալացի հոգևորականները, ովքեր ականատես են եղել թագուհու ողջակիզմանը, թաքուն վերցրել են նրա մասունքները: Գլուխը և աջ ձեռքն ուղարկել են Քեթևանի որդուն` Թեյմուրազ արքային, որոնք թաղվել են Ալավերդու եկեղեցում` 1723թ., սակայն հետագայում անհետացել են:

Նահատակ-թագուհու այլ մասունքներ տարվել են Վատիկան, Բելգիա, ինչպես նաև Գոայի Սուրբ Ավգուստինի տաճար (Հնդկաստան): 19-րդ դարի սկզբին վերջինս ավերվել է:

2013թ. Archeology հեղինակավոր պարբերականի լրագրողը հայտարարել է, որ Գոայի ավերակներում հայտնաբերված ոսկորները, ենթադրաբար, պատկանում են Քեթևան թագուհուն: ԴՆԹ հետազոտությունը ցույց է տվել, որ քարե սարկոֆագից գտնված ձեռքի ոսկորները կապ չունեն Հնդկաստանի հետ և ունեն վրացական ծագում:

2017թ. Քեթևանի մասունքներն արդեն բերվել են Վրաստան` մոտ կես տարի ցուցադրելով Սամեբայի վանքում: Մինչև վերջնական հանձնումը Վրաստանին` թագուհու մասունքները պահվել են Գոայի ազգային թանգարանում:

Միացեք մեր Telegram ալիքին

Թուրքիան Վրաստանին խոչընդոտո՞ւմ է միանալ Հյուսիս-հարավ նախագծին

Հունիսի 1-ին Անկարայում հանդիպեցին Թուրքիայի նախագահ Էրդողանն ու Վրաստանի վարչապետ Ղարիբաշվիլին: Թուրք նախագահը հայտարարեց, թե «Անկարան պատրաստ է աջակցել Ադրբեջան-Վրաստան-Հայաստան կամ Թուրքիա-Ադրբեջան-Վրաստան ձևաչափերով եռակողմ համագործակցությանը` նպաստելով այդ երկրների փոխգործակցության ամրապնդմանը»:

Էրդողանի խոսքերից կարելի է հասկանալ, որ Թուրքիան կողմ է միա´յն Ադրբեջանի ու Հայաստանի հետ Վրաստանի գործընկերությանը, մինչդեռ, օրինակ, Իրանի և Ռուսաստանի հետ կապերին դեմ է: Դա է վկայում հայտարարության մյուս հատվածը, որտեղ Վրաստանը համարվում է «տարածաշրջանային համագործակցության բանալի». կարևորվում են Վրաստանի տարածքով Թուրքիան ու Ադրբեջանն, ինչպես նաև Չինաստանն ու Եվրոպան իրար կապող տրանսպորտային ու էներգետիկ ենթակառուցվածքները:

Ուշագրավ է, որ Էրդողանը շեշտադրում է բացառապես Հարավային գազային միջանցքը և միջազգային տրանսպորտային միջանցքը, մինչդեռ չի շոշափվում իրանահնդկական առաջարկը` Հայաստանով ու Վրաստանով Եվրոպային կապվելու վերաբերյալ:

Թուրքիայի նախագահը «համագործակցության բանալի» ձևակերպմանը զուգահեռ շեշտում է, որ պաշտպանում է Վրաստանի տարածքային ամբողջականությունը, հիշեցնում է Աբխազիայի և Հարավային Օսիայի հակամարտությունների լուծման մասին` կարծես գործարք պարտադրելով. չմիանալ Հյուսիս-հարավ նախագծին, փոխարենը ստանալ աջակցություն հակամարտությունների լուծման և գործող ուղիների զարգացման հարցում:

Պետական ու ազգային շահի տեսանկյունից Վրաստանի համար, անշուշտ, կարևոր են առկա ուղիների հետագա զարգացումը և հակամարտությունների ցանկալի լուծումը, սակայն վարչապետ Ղարիբաշվիլիի` նույն հանդիպման ժամանակ արված հայտարարությունից ակնհայտ է դառնում, որ Վրաստանը թեև հետաքրքրված է առկա հարաբերությունների խորացմամբ, բայց չի պատրաստվում սահմանափակվել դրանով:

Այս մասին է վկայում վրաց վարչապետի կողմից «տարածաշրջանային համագործակցության» կարևորումը` ի պատասխան Էրդողանի «եռակողմ համագործակցության» մասին շեշտադրումներին: Ուստի ենթադրվում է, որ վարչապետի այցն Անկարա միտված էր նաև թուրքական կողմից այս հարցում գործի դրվող խոչընդոտների չեզոքացմանը:

Վահրամ Հովհաննիսյան

Տարածաշրջանային հարցերի մասնագետ, REGST.net-ի հիմնադիր

Նյութը տեղադրվել է «Արմենպրես» լրատվական գործակալության կայքում, 02.06.2021թ.

Միացեք մեր Telegram ալիքին

Վրաստանը քննարկում է ցամաքային սահմանները բացելու հարցը

Վրացական լրատվամիջոցների հաղորդմամբ` Էկոնոմիկայի և կայուն զարգացման նախարար Նատիա Թուրնավան հայտարարել է, որ Վրաստանի կառավարությունն աշխատանքներ է տանում ցամաքային սահմանները բացելու ուղղությամբ:

Նախարարի խոսքով` ենթադրվում է, որ ցամաքային սահմաններում կիրականացվեն մուտքի նույն կանոնները, ինչ` օդային ուղիների դեպքում:

Ներկայումս Վրաստան ժամանող օտարերկրացիները պետք է վերջին 72 ժամում արված ՊՇՌ թեստի բացասական արդյունքները հավաստող տեղեկանք ներկայացնեն: Վրաստանում տևական ժամանակ մնալու պարագայում այդ անձինք եռօրյա ժամկետում կրկնակի թեստավորում պետք է անցնեն:

Միացեք մեր Telegram ալիքին

Ախալքալաքում կարող է տեղակայվել թուրքական ռազմաբազան

Ռեալիստ տեղեկատվական գործակալությունը ( ИА Реалист ), հղում անելով Թբիլիսիի իր աղբյուրներին, հաղորդում է, որ Թուրքիան մտադիր է Վրաստանում` Ախալքալաքում (Ջավախք), իր ռազմաբազան տեղակայել: Այստեղ, ինչպես հիշում ենք, մինչև 2007 թվականը տեղակայված է եղել ռուսական 62-րդ ռազմաբազան:

Հայտնի է, որ Վրաստանի բոլոր ավիաբազաները և ռազմական այլ կառույցներ վերանորոգել են թուրքական ընկերությունները, ինչից հետո դրանք հայտնվել են թուրքական վերահսկողության ներքո: Ախալքալաքի դեպքում նույնպես, ինչպես նշվում է, թուրքական ընկերություններն են ներգրավված:

Աղբյուրի հաղորդմամբ` վերանորոգման աշխատանքներն արդեն մեկնարկել են:

Հեղինակն ընդգծում է, որ Ռուսաստանը ոչ թե հեռացել է Վրաստանից, այլ զիջել է Թուրքիային: Որպես այդօրինակ զիջումների հետևանք է նշվում թուրք-ադրբեջանական ագրեսիան Արցախի և Հայաստանի նկատմամբ:

Նկարը` © JAM news

Միացեք մեր Telegram ալիքին

Վրաստանի տնտեսությունն արդեն 11 ամիս շարունակում է անկում գրանցել

Վրաստանի տնտեսական անկումը կորոնավիրուսային համավարակի և կարանտինային խիստ սահմանափակումների պայմաններում շարունակվում է: Հունվար ամսին տնտեսական անկումը կազմել է 11,5%` նախորդ տարվա նույն ամսվա համեմատ:

Վրաստանի վիճակագրական ծառայության հաղորդմամբ` երկրի ՀՆԱ-յի վրա հունվար ամսին ազդել է անկումը մի շարք ոլորտներում. շինարարություն, տրանսպորտ, պահեստավորում, վերամշակող արդյունաբերություն, մշակույթ, ժամանց, հանգիստ, անշարժ գույքի գործարքներ, էլեկտրամատակարարում, գազամատակարարում, ջրամատակարարում և հովացում, մանրածախ և մեծածախ առևտուր, ավտոմեքենաների և մոտոցիկլերի վերանորոգում: Աճ է գրանցվել ֆինանսների, ապահովագրության և տեղեկատվական հաղորդակցության գործունեության ոլորտներում:

Հունվար ամսին շարունակվել է նաև արտաքին առևտրի ցուցանիշների նվազումը` 2020թ. հունվարի համեմատ` 16,5%: Արտահանումը Վրաստանից կազմել է 16,2%, ներկրումը` 16,6%:

Հաղորդվում է, որ տնտեսական բացասական տեմպերը Վրաստանում շարունակվում են արդեն 11 ամիս: ՀՆԱ-յի կրճատումը, ինչպես պարզվեց, կառավարության կանխատեսումներից ավելին էին. հաշվարկված 5% անկման փոխարեն 2020թ. Վրաստանի համախառն ներքին արդյունքը գրանցել է 6,1% անկում: Սա վերջին 25 տարվա ընթացքում ամենավատ ցուցանիշն է:

Վիճակագրական տվյալների համաձայն` նախորդ տարի Վրաստանի տնտեսական ցուցանիշները հետևյալ տեսք են ունեցել. հունվար` 5,1% աճ, փետրվար` 2,2% աճ, մարտ` 2,7% անկում, ապրիլ` 13,5% անկում, մայիս` 16,6% անկում, հունիս` 7,7% անկում, հուլիս` 5,5% անկում, օգոստոս` 5,3% անկում, սեպտեմբեր` 0,7% անկում, հոկտեմբեր` 3,9%, նոյեմբեր` 7,7% անկում, դեկտեմբեր` 7,9% անկում:

Նկարը` © SOVA

Միացեք մեր Telegram ալիքին

Նիկոլ Փաշինյանը շնորհավորել է Վրաստանի նորանշանակ վարչապետին

Վարչապետ Նիկոլ Փաշինյանը շնորհավորական ուղերձ է հղել Վրաստանի նորանշանակ վարչապետ Իրակլի Ղարիբաշվիլիին՝ վարչապետի պաշտոնն ստանձնելու կապակցությամբ: Ուղերձում նշված է.

«Ձերդ Գերազանցություն,

Շնորհավորում եմ Ձեզ Վրաստանի վարչապետի պաշտոնն ստանձնելու կապակցությամբ և մաղթում հաջողություն այդ կարևոր և պատասխանատու պաշտոնում՝ ի շահ Վրաստանի և վրաց ժողովրդի:

Հայաստանի և Վրաստանի միջև առկա ամուր բարեկամությունը հիմնված է մեր ժողովուրդների միջև հարյուրամյակների պատմություն ունեցող փոխադարձ շփումների, խոր հարգանքի և վստահության վրա:

Համոզված եմ, որ մեր կառավարությունները կշարունակեն սերտորեն համագործակցել համատեղ ծրագրերի իրականացման ուղղությամբ՝ Հայաստանի և Վրաստանի միջև փոխգործակցության ողջ ներուժը առավելագույնս օգտագործելու նպատակով՝ ի բարօրություն մեր երկրների»:

Հիշեցնենք, որ Գեորգի Գախարիայի հրաժարականից հետո Վրաստանում վարչապետի պաշտոնում է նշանակվել պաշտպանության նախարար Իրակլի Ղարիբաշվիլին:

Նկարը` © Primeminister.am

Միացեք մեր Telegram ալիքին

Չինաստանը շրջանցել է Թուրքիային` դառնալով Վրաստանի առևտրային խոշոր գործընկերը

Վերջին տարիների ընթացքում առաջին անգամ 2021թ. հունվարին Վրաստանի առևտրային խոշոր գործընկեր է դարձել Չինաստանը, որի հետ արտաքին առևտրի շրջանառութունը կազմել է 126,5 մլն դոլար: Հաջորդ 10-յակում են` Թուրքիան` 114,3 մլն դոլար, Ադրբեջանը` 86,2 մլն, Ռուսաստանը` 78,3 մլն, ԱՄՆ-ը` 39,7 մլն, Ուկրաինան` 36,8 մլն, Բուլղարիան` 33 մլն, Գերմանիան` 25,2 մլն, Հայաստանը` 23,9 մլն, և Իտալիան` 18 մլն դոլար:

Վրաստանի վիճակագրական ազգային ծառայության տվյալներով` նշված 10 երկրներին բաժին է ընկնում վրացական ապրանքների արտահանման 80%-ը. Վրաստանից արտահանման ուղղությունների շարքում առաջին տեղում Ադրբեջանն է, ապա` Բուլղարիան և Չինաստանը: Արտահանվում են հիմնականում պղնձանյութ և խտանյութեր (կոնցենտրատներ): Նախորդ ամսվա ընթացքում դրանց արտահանումից ստացված գումարը կազմել է 49,7 մլն դոլար (ընդհանուր ծավալի 22,1%-ը): Երկրորդ տեղում թեթև մարդատար ավտոմեքենաներն են` 24,9 մլն դոլար (11,1%): Վրաստանից արտահանվող ապրանքների շարքում երրորդ տեղում երկաթամիահալվածքներն են` 23,3 մլն դոլարի (10,4%):

Հունվար ամսին Վրաստան ներմուծված ապրանքների մեջ գերակշռում են չինականները: Ներմուծող երկրների շարքում, Չինաստանից հետո, Թուրքիան է և Ռուսաստանը: Ներկրվում է հիմնականում նավթային գազ (46,3 մլն դոլար կամ ընդհանուր ծավալի 8,6%-ը), մեքենաներ և շարժողական, փորիչ և հորատիչ մեխանիզմներ (40,8 մլն դոլար կամ 7,6%), նավթ և նավթամթերք (36,6 մլն դոլար կամ 6,8%):

Վրաստանի ՎԱԾ-ի տվյալներով` երկրի արտաքին առևտրի շրջանառությունը 2021թ. հունվարին ընդհանուր առմամբ կազմել է 762,5 մլն դոլար, ինչը նախորդ տարվա նույն ամսվա համեմատ 16,5%-ով քիչ է:

Նկարը` © Global Atlanta

Միացեք մեր Telegram ալիքին

Վրաստանի վարչապետի պաշտոնում առաջադրվել է պաշտպանության նախարարի թեկնածությունը

Վրաստանի վարչապետի պաշտոնում իշխող «Վրացական երազանք» կուսակցությունն առաջադրել է երկրի պաշտպանության նախարար Իրակլի Գարիբաշվիլիի թեկնածությունը: Հիշեցնենք` վարչապետ Գեորգի Գախարիան փետրվարի 18-ին անսպասելիորեն հրաժարական է ներկայացրել:

Իրակլի Գարիբաշվիլինի ավելի վաղ զբաղեցրել է վարչապետի պաշտոնը` 2013թ. փոխարինելով Բիձինա Իվանիշվիլիին: 2015թ. նա անսպասելի հրաժարական է ներկայացրել և հեռացել քաղաքականությունից` հիմնավոր պատճառներ չներկայացնելով:

Գարիբաշվիլին նաև իշխող «Վրացական երազանք» կուսակցության հիմնադիրներից ու առաջնորդներից է, զբաղեցրել է նաև ներքին գործերի նախարարի պաշտոնը:

Նկարը` © Geomigrant \ Իրակլի Գարիբաշվիլի

Միացեք մեր Telegram ալիքին

Վրաստանի վարչապետը հրաժարական է ներկայացրել

Վրաստանի վարչապետ Գեորգի Գախարիան հատուկ հրավիրված ճեպազրույցի ժամանակ հայտնել է, որ հրաժարական է ներկայացրել զբաղեցրած պաշտոնից:

Գախարիան հայտարարել է, որ այդպիսի որոշում է կայացրել` «հավատալով և ցանկանալով, որ այդ քայլը կօգնի երկրի քաղաքական դաշտի բևեռացման նվազեցմանը», քանի որ վստահ է, որ բևեռացումը և ներքին դիմակայությունը Վրաստանի ապագայի, տնտեսական զարգացման և ցանկացած տեսակի ճգնաժամերի լուծման համար ամենամեծ վտանգն է:

Նկարը` © NewsGeorgia \ Գեորգի Գախարիա

Միացեք մեր Telegram ալիքին

Հնդկաստանը մտադիր է Վրաստանի հետ ազատ առևտրի պայմանագիր կնքել և դեսպանություն բացել

Վրաստանի վարչապետ Գեորգի Գախարիան և այդ երկրում Հնդկաստանի դեսպան Կաշան Դան Դյուալը հանդիպման ժամանակ քննարկել են Թբիլիսիում դեսպանության բացման, ինչպես նաև երկու երկրների միջև ազատ առևտրի վերաբերյալ համաձայնության ձևակերպման հարցերը:

Հաղորդվում է, որ քննարկման ժամանակ մեծ ուշադրություն է դարձվել հատկապես երկու երկրների առևտրատնտեսական հարաբերությունների հետագա խորացմանը:

Հնդկաստանի դեսպանն ընդգծել է, որ իր երկիրը պատրաստ է ազատ առևտրի վերաբերյալ համաձայնության շուրջ բանակցություններն ավելի ինտենսիվ դարձնել:

Վրաստանի վարչապետի մամուլի ծառայության հաղորդմամբ` նպատակահարմարության վերաբերյալ համապատասխան հետազոտությունն արդեն ավարտվել է, և առաջիկայում կկայանա բանակցությունների առաջին փուլը:

© Gov.ge \ Վրաստանում Հնդկաստանի դեսպանի և Վրաստանի վարչապետի հանդիպումը

Միացեք մեր Telegram ալիքին

Վրաստանը գնում էր դեպի Եվրոպա, բայց հայտնվեց Թուրքիայում. Շոթա Ափխաիձե

Վրաստանի վարչակազմում տեղի է ունեցել «Թրամփի» փոխարինում «Բայդենով»: Խորհրդարանում մեծամասնություն են դառնում ուլտրա-լիբերալները և «սորոսականները»: Արտաքին քաղաքական ուղղությունը Ռուսաստանի դեմ է: «Կոլեկտիվ Արևմուտք» կարգախոսի ներքո զարգանում է Թուրքիայի տնտեսական, քաղաքական և մշակութային էքսպանսիան Վրաստանի հարավային և արևմտյան շրջաններում: Փաստացի, Թուրքիան տիրապետում է նախկին խորհրդային հանրապետության անշարժ գույքի մեծ մասին: Արտաքին ներդրումների 80%-ը թուրքական են: Անդրազգային նախագծերի շրջանակներում Վրաստանն արդեն ներառված է Թուրքիայի սեփական համալիրների շարքում: Վրաստանի շրջաններում թուրքական հատուկ ծառայությունները պարբերաբար միջկրոնական բախումներ են հրահրում:

Քաղաքագետ, Կովկասի անվտանգության հարցերով մասնագետ Շոթա Ափխաիձեն նշում է, որ Վրաստանը գնում էր դեպի Եվրոպա, սակայն հայտնվեց Թուրքիայում:

Ափխաիձեի խոսքով` ներկայումս վրաց քաղաքական կյանքում ընթանում են կադրային փոփոխություններ, ինչը պայմանավորված է ԱՄՆ-ի նոր նախագահի ընտրությամբ: Վրաստանի քաղաքական վերնախավում ուլտրալիբերալներն են արդեն որոշում կայացնում` ամերիկամետ հայացքներ ունեցողները: Վերջիններս Ռուսաստանի նկատմամբ պահպանում են միլիտարիստական մոտեցումները, դիտարկում են Ռուսաստանի հետ պատերազմը, եվրաատլանտյան ուղղությունը, ՆԱՏՕ-ական ու ամերիկյան բազաների տեղակայումը Վրաստանում, անդամակցությունը ՆԱՏՕ-ին:

Սակայն, Ափխաիձեի համոզմամբ, Վրաստանի համար ներկայումս լրջագույն վտանգը ոչ թե Արևմուտքն է, այլ Թուրքիան, որը սպառնալիք է ոչ միայն Վրաստանի ինքնիշխանության համար, այլև` ամբողջ տարածաշրջանի անվտանգության:

Գիտությունների դոկտորի խոսքով` Թուրքիան, բացի իր նեոօսմանյան, պանթյուրքիստական, սալաֆիստական և էրդողանական գաղափարախոսությունները, հետևողականորեն առաջ է մղում նաև Ամերիկայի, Բրիտանիայի և ՆԱՏՕ-ական երկրների միլիտարիստական (ռազմական) հետաքրքրությունները:

Շոթա Ափխաիձեն պնդում է, որ Թուրքիան Վրաստանի նկատմամբ հիբրիդային ագրեսիա է դրսևորում, տնտեսական, քաղաքական, մշակութային-հումանիտար էքսպանսիա, որն արտահայտվում է տարբեր ոլորտներում, այդ թվում` կրոնական:

Վրաստանը Թուրքիային հետաքրքրում է իր աշխարհագրական դիրքով` որպես տարանցիկ երկիր յուրացման և հետագա առաջընթացի համար, ելք դեպի Կասպից ծով ու հետո` Կենտրոնական Ասիա ու Սիբիր:

Քաղաքագետը Թուրքիայի կողմից մեծ վտանգի օրինակ է բերել վերջերս Գուրիում տեղի ունեցած միջադեպը. այս շրջանը սահմանակից է Աջարիային (ինքնավար հանրապետություն): Այստեղ կողք կողքի ապրում են սունի իսլամը դավանող վրացիներ և ուղղափառ վրացիներ: Եվ նրանց միջև կրոնական հողի վրա բախում է տեղի ունեցել:

Նրա համոզմամբ` բախումն արտաքին հրահրմամբ է ծագել, արհեստականորեն, դրանց ետևում հիմնականում թուրքական հատուկ ծառայություններն են, թուրքական ոչ կառավարական կազմակերպությունները, թուրքական դեսպանության աշխատակիցները, որոնց հաջողվել է էթնիկ վրացիների միջև բախում առաջացնել:

Այդօրինակ բախումները Վրաստանի տարածքում վերջին շրջանում հաճախակի են դարձել: Դա տեղի է ունենում հատկապես Աջարիայում, որտեղ Թուրքիայի գործակալների ազդեցությունը մեծ է: Նրանց շարքում կան օրենսդիր մարմնի քաղաքական գործիչներ, հասարակական գործիչներ, կրոնական առաջնորդներ, գիտական և գործարար էլիտաների ներկայացուցիչներ:

Բաթումի մուսուլմանները պահանջում են այստեղ Ազիզյեի անվան մզկիթ կառուցել, ով օսմանյան զավթողականության խորհրդանիշն է, իսկ Աջարիան շուրջ 400 տարի գտնվել է Օսմանյան կայսրության տիրապետության տակ: Նույնանուն մզկիթ այստեղ նախկինում եղել է, բայց խորհրդային տարիներին ոչնչացվել է: Սակայն Ափխաիձեն նշում է, որ մզկիթ, այնուամենայնիվ, Բաթումում կա, աղոթելու խնդիր մուսուլմանները չունեն, ուստի նոր մզկիթի կառուցումը կարող է պարզապես սադրանք լինել, իրավիճակը լարելու փորձ:

Քաղաքագետն ընդգծում է, որ Թուրքիայի և Վրաստանի միջև տնտեսական լուրջ կապեր կան. Վրաստան ներկրվող ապրանքների 75%-ը թուրքական է, այսինքն` վրացական շուկայի մեծ մասը Թուրքիայի հսկողության ներքո է: Վրաստանում կատարվող արտաքին ներդրումների 80%-ը թուրքական են, այսինքն` Թուրքիայի տնտեսական ամենամեծ ազդեցությունն ու ներկայությունը Վրաստանում փաստ է:

Ի՞նչ վտանգ է, այդուհանդերձ, Թուրքիան ներկայացնում: Այս հարցին պատասխանելիս մասնագետը նշում է, որ Թուրքիան վաղ թե ուշ կարող է հայտարարել իր քաղաքական հետաքրքրությունների մասին, որոնք երբեք չի էլ թաքցրել: Օրինակ, Դավութօղլուի «Ռազմավարական խորություն» գրքում շարունակվում է Էրդողանի նեոօսմանյան գաղափարախոսությունը` Օսմանյան կայսրության նախկին տարածքներ հռչակելով Բաթումը, Բենգազին, Սկոպյեն, որոնք «պետք է վերադարձվեն»:

Այսպես, Շոթա Ափխաիձեի խոսքով, Վրաստանը ձգտել է դեպի Եվրամիություն, Եվրաատլանտյան դաշինք, ՆԱՏՕ: «Սակայն վրաց երկիրն այլ աշխարհում է հայտնվել, կարելի է ասել` հայտնվել ենք Թուրքիայում, Օսմանյան կայսրությունում, քանի որ Արևմուտքը զիջել է` չցանկանալով ծախսել իր բարոյական ու ֆինանսական միջոցները»,- նշում է քաղաքագետը:

Ափխաիձեի գնահատմամբ` Արևմուտքը Վրաստանը փոխանցել է Թուրքիային, և քանի որ վերջինս ՆԱՏՕ անդամ է, ապա Վրաստանն արդեն դիտարկվում է Թուրքիայի ազդեցության գոտում գտնվող նատօյական երկիր: Ուստի, քաղաքագետի համոզմամբ, եթե Վրաստանը մտնի ՆԱՏՕ, ապա այնտեղ տեղակայվելու են ոչ թե ամերիկյան, այլ թուրքական բազաները: Այսինքն, Արևմուտքը Թուրքիայի ձեռքով կլուծի բոլոր հարցերը` քաղաքական ու տնտեսական առճակատում ունենալով Ռուսաստանի, Իրանի կամ Չինաստանի հետ:

Քաղաքագետը հավաստում է, որ ինչքան էլ թվա, թե Էրդողանն ու Եվրամիությունը կամ Ամերիկան հակասություններ ունեն, այնուամենայնիվ, թուրքական քաղաքական ֆինանսական էլիտաները, անձամբ նաև Էրդողանը, կապված են Արևմուտքի հետ: Թուրքական բանկային համակարգն արևմտյան անդրազգային ֆինանսական կորպորացիաների լիարժեք մասն է կազմում:

Կովկասի անվտանգության հարցերով մասնագետի խոսքով` Թուրքիայի թիկունքում Անգլիան է, անգլիական հատուկ ծառայությունները, որոնք էլ ղեկավարում են բոլոր գործընթացները: Հենց այդ պատճառով էլ Վրաստանում թուրքական ներկայությունը վտանգավոր է, բայց վտանգը սպառնում է ոչ միայն Վրաստանին, այլև ամբողջ Կովկասին, ընդ որում` նաև Հյուսիսային Կովկասին: Քաղաքագետը հիշեցնում է 90-ականները, երբ թուրքական հատուկ ծառայությունները բուռն աշխատանք էին ծավալել էթնիկ ու կրոնական տարբեր խմբերի, ծայրահեղականների ու արմատական իսլամիստների շրջանում:

Ափխաիձեն հիշեցնում է նաև, որ ահաբեկիչների Թուրքիայում ֆինանսավորում են, նրանց խմբավորումներ են կազմավորում, պատրաստում, ապա ուղարկում դիվերսիաների:

Նկար` © Pikabu

Միացեք մեր Telegram ալիքին

Ուկրաինական «Մոտոր Սիչը» կվերանորոգի վրացական ռազմական ուղղաթիռները

Ուկրաինական «Մոտոր Սիչ» ընկերությունը, Վրաստանի պաշտպանության նախարարության հաղորդմամբ, կիրականացնի վրացական զինված ուժերի Մի-8 ուղղաթիռների կապիտալ վերանորոգումը և մոդեռնիզացիան:

Նախօրեին Վրաստանի պաշտպանության նախարար Իրակլի Գարիբաշվիլին Թբիլիսիում ընդունել է ուկրաինական պատվիրակությանը: Ստորագրվել է եռակողմ հուշագիր` «Մոտոր Սիչի», պետական ռազմական գիտատեխնիկական կենտրոնի` «Դելտայի» և Թբիլիսիի ավիացիոն գործարանի («Թբիլավիամշենի») միջև:

Հաղորդվում է, «Մոտոր Սիչն» արդեն վերանորոգում է Վրաստանի ԶՈՒ ուղղաթիռների շարժիչներն ու ռեդուկտորները: Ստորագրված հուշագիրը պետք է խորացնի առկա համագործակցությունը և այն նոր մակարդակի բարձրացնի:

Վրաստանի ՊՆ-ն նշում է, որ ռազմական արդյունաբերության զարգացման ուղղությամբ համագործակցությանն ուղղված հուշագրի շրջանակներում իրականացվելու են համատեղ նախագծեր` բազմագործառույթ Մի-8 ուղղաթիռների շարժիչների կապիտալ վերանորոգում ու մոդեռնիզացիա:

Հայտնի է, որ «Մոտոր Սիչը» ավիացիոն տեխնիկայի շարժիչների, ինչպես նաև գազատուրբինային արդյունաբերական համակարգերի խոշորագույն արտադրողներից մեկն է աշխարհում: Ընկերությունն իր արտադրանքը մատակարարում է 100 երկիր: 2020թ. հունվար-սեպտեմբեր ամիսներին ձեռնարկության զուտ շահույթը կազմել է 33 մլն դոլար:

Միացեք մեր Telegram-ին

Հայաստանի և Վրաստանի ԱԳ նախարարները հանդիպել են Ծինանդալում

Հայաստանի Հանրապետության արտաքին գործերի նախարար Արա Այվազյանն աշխատանքային այցով մեկնել է Վրաստան: Նրան ընդունել է Վրաստանի ԱԳ նախարար, փոխվարչապետ Դավիդ Զալկալիանին: Երկու երկրների կառավարությունների անդամների առաջին հանդիպումը կայացել է Կախեթի Ծինանդալ բնակավայրում:

Այվազյանի և Զալկալիանիի հանդիպման ընթացքում քննարկվել է երկկողմ հետաքրքրություն ներկայացնող հարցերի լայն շրջանակ: Վրացական աղբյուրի հաղորդմամբ` քննարկվել են երկու երկրների բարիդրացիական հարաբերությունների, դրանց հետագա խորացման հեռանկարների ու համագործակցության օրակարգին վերաբերող հարցեր:

На изображении может находиться: 2 человека, люди стоят
© MFA of Georgia

Հավելենք, որ հունվարի 21-ից Վրաստանի ԱԳ նախարարը միաժամանակ զբաղեցնում է նաև փոխվարչապետի պաշտոնը: Վարչապետ Գեորգի Գախարիան նրան այդ պաշտոնում նշանակելիս հայտարարել է, որ փոխվարչապետի գործունեության ուղղություններն են երկրի դեօկուպացիան և ինտեգրումը: Առաջին փոխվարչապետը միաժամանակ նաև տարածքային զարգացման և ենթակառուցվածքների նախարար Մայա Ցկիտիշվիլին է, ով զբաղվելու է երկրի տնտեսական հարցերով:

Միացեք մեր Telegram-ին

Վրաստանում ճոպանուղին կօգտագործեն որպես տրանսպորտային միջոց

Հաշվի առնելով եղանակային անբարենպաստ պայմանները` Վրաստանի լեռնադահուկային հանգստավայրում ուղևորներին փոխադրելու նպատակով որպես տրանսպորտային հաղորդակցության այլընտրանքային միջոց վերագործարկվել է Գուդաուրի-Կոբի ճոպանուղին:

Համաճարակային իրավիճակի վատթարացման պատճառով Վրաստանի ձմեռային բոլոր հանգստավայրերում 2020-2021 սեզոնի բացումը հետաձգվել էր: Նոյեմբերի 28-ից Գուդաուրի, Բակուրիանի, Գոդերձի և Մեստիա բնակավայրերում զբոսաշրջային ճոպանուղիների, հյուրանոցների և սննդի կետերի աշխատանքը դադարեցվել էր:

Սահմանափակումները, ամենայն հավանականությամբ, կպահպանվեն առնվազն մինչև փետրվարի 1-ը, իսկ մինչ այդ, ճոպանուղին քաղաքացիների համար տրանսպորտային միջոց կծառայի:

Հաղորդվում է, որ Գուդաուրի, Պիրնի, Կոբի և Տրուսո բնակավայրերն իրար կապող ճոպանուղին աշխատելու է անվճար, մինչև 17:00-ն: Ուղևորության միջին տևողությունը 40 րոպե է:

Գուդաուրին Կոբիին կապող ճոպանուղին Վրաստանում ամենաերկարն է` 9,5 կմ: Այն կառուցվել է 2019թ.:

Միացեք մեր Telegram ալիքին