Ռուսաստանի ՊՆ-ն Կովկասի կայազորերում նոր զինատեսակներ է ցուցադրելու

Ռուսական կովկասյան 58-րդ համազորային բանակի ռազմական կայազորերում օգոստոսին կայանալիք «Բանակ-2021» միջազգային ռազմատեխնիկական ֆորումի շրջանակներում առաջին անգամ ներկայացվելու են նորագույն զինատեսակներ ու ռազմական տեխնիկայի նմուշներ:

Հաղորդվում է, որ ֆորումի զանգվածային միջոցառումներն ընթանալու են Վլադիկավկազում, Գրոզնիում, Նալչիկում, ինգուշական Տրոիցկոյե բնակավայրում, Հարավային Օսիայում` Ցխինվալի ռազմաբազայում, ինչպես նաև դաղստանյան Կասպիյսկ քաղաքում: Այցելուներին ներկայացվելու են ժամանակակից զինատեսակների ու ռազմական տեխնիկայի ավելի քան հազար նմուշներ, որոնցով համալրված են Հարավային ռազմական շրջանի 58-րդ բանակի միավորումներն ու զորամասերը:

Ինչպես նշվում է, ցուցադրվելու են ԱԿ-12 ինքնաձիգեր, «Վալ» դիպուկահար անձայն ինքնաձիգեր, Յարիգինի ատրճանակներ, Տ-90 և Տ-72Բ3 տանկեր, ծանր հրանետային ՏՈՍ-1Ա «Սոլնցեպյոկ» համակարգեր, ԲՄՊ-3 հետևակի մարտական մեքենաներ, ԲՏՌ-82Ա զրահափոխադրիչներ, «Լինզա» բժշկական զրահամեքենաներ, Մի-8ԱՄՏՇ «Տերմինատոր» և Կա-52 «Ալիգատոր» ուղղաթիռներ և այլ տեխնիկա:

Օգոստոսի 26-28-ն անցկացվելիք «Բանակ-2021» միջազգային ֆորումի կազմակերպման համար ներգրավվել են ՀՌՕ-ի շուրջ 2 հազար զինծառայողներ: Միջոցառման շրջանակներում գործարկվելու են ռազմական շրջանի շուրջ 300 միավոր ժամանակակից ռազմական և հատուկ տեխնիկա, 20 նավեր, ՀՕՊ և ՌԾՈՒ մոտ 70 ինքնաթիռներ և ուղղաթիռներ, ինչպես նաև Սևծովյան նավատորմի ծովային ավիացիան:

Միացեք մեր Telegram ալիքին

ՆԱՏՕ-ն Ռուսաստանի վրա կհարձակվի ներքաղաքական ճգնաժամի դեպքում. Ջարալլա

Ղրիմցի քաղաքագետ Վլադիմիր Ջարալլայի համոզմամբ` ՆԱՏՕ-ն Կիևի հետ համատեղ պարբերաբար զորավարժություններ է անցկացնում Սև ծովի ավազանի ուկրաինական տարածքում (Sea Breeze 2021), որպեսզի տեղեկատվական-հոգեբանական ներգործություն ունենա Մոսկվայի վրա:

Քաղաքագետի խոսքով` Հյուսիսատլանտյան դաշինքի ռազմավարությունը ենթադրում է մշտական ճնշում Ռուսաստանի վրա: Ջարալլան կարծում է, որ Արևմուտքը ցանկանում է հյուծել Ռուսաստանը, այնպես, ինչպես դա իրականացվել է ԽՍՀՄ-ի դեմ «Սառը պատերազմի» գործընթացում: Բացի այդ, նրա խոսքով, ՆԱՏՕ-ն մշակում է նաև ռազմական գործողությունների իրականացման վարկածներ:

Փորձագետի համոզմամբ` եթե Ռուսաստանում սկիզբ առնի ներքաղաքական ճգնաժամ, ապա դա թույլ կտա հնարավորինս արդյունավետ ներխուժում իրականացնել: Ուստի ակնհայտ է համարում զորավարժությունների անցկացման նպատակը: Խոսքը, ինչպես նշում է, միայն Ղրիմի մասին չէ, այլ, ընդհանուր առմամբ, Ռուսաստանի:

Ջարալլան չի բացառում հակամարտության իրավիճակների ծագում, որոնք կարող են ի հայտ գալ նշված վարժանքների ընթացքում:

Նրա խոսքով` ՌԴ-ի ջրային տարածքը կարող են հատել` որակելով «պատահականություններ», որին կհետևի ռուսական կողմի կոշտ արձագանքը: «Արդյունքում` ոչնչից ճգնաժամ կառաջան»:

Փորձագետն ուշադրություն է հրավիրում այն հանգամանքի վրա, որ ԱՄՆ-ը և Հարավային Կորեան պարբերաբար համատեղ խուսավարումներ են իրականացնում Կորեական թերակղզում կամ հարակից ջրային ավազանում, որոնք ուղղված են Հյուսիսային Կորեայի դեմ: Միաժամանակ, Ջարալլայի խոսքով, հաճախ են ստեղծվում այնպիսի իրավիճակներ, երբ Փխենյանը շատ խիստ է արձագանքում, ինչից հետո Սեուլն ու Վաշինգտոնը հարկադրված են լինում զսպել իրենց ռազմատենչությունը:

Սակայն Ռուսաստանի դեպքում, ինչպես նշում է փորձագետը, ավելի լավ է «վառոդը չոր պահել»:

Միացեք մեր Telegram ալիքին

Թուրքիան «առաջին պլան» է ձգտում. ինչպե՞ս են արձագանքում դրան Ռուսաստանում

Բազմաթիվ փորձագետներ արդեն նշել են միջազգային թատերաբեմում Թուրքիայի մեծացած դերի մասին: Համարվում է, որ Էրդողանի օրոք նրա երկիրը մեծ ազդեցություն է ստացել աշխարհում` Ֆրանսիային կամ Մեծ Բրիտանիային համարժեք (երկրորդ շարք): Սակայն Անկարան ձգտում է առաջին շարքում հայտվել: Այդ նպատակով ստեղծում է իր «Ալեքսանդր Մակեդոնացու կայսրությունը»` Արևելյան Միջերկրածովից մինչև Աֆղանստան:

Ռուսաստանում սովորել են Թուրքիային համարել երկրորդական երկիր, սակայն համարվում է, որ դա այլևս այդպես չէ: 80 մլն բնակչությամբ, զարգացած արդյունաբերությամբ ու գիտությամբ պետությունը յուրահատուկ դիրքեր ունի Կիպրոսում, Լիբիայում, Սիրիայի և Իրաքի հյուսիսում, Անդրկովկասում, Միջին Ասիայում, իսկ այժմ նաև` Աֆղանստանում:

Նշվում է, որ Բայդենի վարչակազմն Էրդողանին առաջարկել է ընդլայնել թուրքական ազդեցությունը` հույս ունենալով առճակատում առաջացնել Ռուսաստանի և Չինաստանի հետ: Սակայն թուրք նախագահը շարունակում է խաղալ հակասությունների վրա` պահպանելով հավասարակշռությունը բոլոր երեք առանցքային դերակատարների` Վաշինգտոնի, Պեկինի և Մոսկվայի հետ:

Ռուսաստանի և Թուրքիայի միջև 2016թ.-ից ռազմավարական գործընկերության առանձնահատուկ հարաբերություններ են ձևավորվել: Սակայն կողմերից յուրաքանչյուրն իր հետաքրքրություններն ունի: Ընդհանուր առմամբ, ինչպես նշվում է, Մոսկվայի ձեռքբերումը սիրիական պատերազմում ռուս-թուրքական նման հարաբերությունների հաստատումն է: Սակայն դրանք նախկինի պես փխրուն են:

Սիրիայում ռազմական գործողությունների դադարից հետո (2020թ. սկիզբ), երբ թուրքական բանակն Իդլիբում առաջին անգամ սկսեց կռվել Սիրիայի կառավարական զորքերի դեմ, Մոսկվայի և Անկարայի միջև փոխըմբռնման համաձայնություն կայացավ: Նույնը տեղի ունեցավ նաև Լիբիայում: Սակայն Արցախը խառնեց խաղաքարտերը:

Համարվում է, որ Անկարան Անդրկովկասում խստորեն պահպանում է Մոսկվայի հետ փոխգործակցության կանոնները: Սակայն այստեղ նրա քաղաքականությունն առավել հաջողված է: Փաստացի` Թուրքիայի և Ադրբեջանի միջև երկարաժամկետ ռազմավարական դաշնակցություն է հաստատվել, թուրքական կողմը սկսել է ամրանալ Կենտրոնասիական տարածաշրջանում և Աֆղանստանում:

Այդ ամենը ենթադրում է, որ Ռուսաստանի և Թուրքիայի միջև բանակցությունների նոր փուլ է նախատեսվում: Իրավիճակը, ինչպես նշվում է, փոխվել է. անհրաժեշտ է նոր հանդիպում և մտադրությունների հստակեցում: Այդ պատճառով Պուտինի և Էրդողանի հնարավոր հանդիպման մասին լուրը զարմանալի չեն: Ընդ որում` հնարավոր է համարվում, որ այն արդեն ավելի բարդ է լինելու և առավել մեծ ազդեցություն է ունենալու համաշխարհային քաղաքականության վրա, քան Պուտինի և Բայդենի հանդիպումը` Ժնևում:

Նկարը` © РИА Новости \ Ռուս և թուրք զինվորականներ` Սիրիայում

Միացեք մեր Telegram ալիքին

Քննարկվել են Հայաստանում տիեզերական ոլորտի զարգացման հնարավորությունները

ՀՀ բարձր տեխնոլոգիական արդյունաբերության նախարարի պաշտոնակատար Հայկ Չոբանյանը «Տիեզերական տարածության հետազոտում» խորագրով Սանկտ Պետերբուրգում անցկացվող GLEX-2021 միջազգային համաժողովի շրջանակներում հանդիպել է «Ռոսկոսմոս» պետական կորպորացիայի գլխավոր տնօրեն Դմիտրի Ռոգոզինի հետ:

Հանդիպման ընթացքում քննարկվել են Հայաստանում տիեզերական ոլորտի զարգացման շրջանակներում հնարավոր համագործակցությանը վերաբերվող հարցեր։
Հայկ Չոբանյանը շեշտադրել է Հայաստանի Հանրապետությունում տիեզերական ծառայությունների և տեխնոլոգիաների զարգացման, և այդ շրջանակներում համագործակցության կարևորությունը։

Անդրադարձ է կատարվել Հայաստանի Հանրապետության և Ռուսաստանի Դաշնության միջև միջպետական համաձայնագրի կնքման ընթացքին, համատեղ ծրագրերի իրականացման, տիեզերական գործունեության ոլորտի զարգացման համատեքստում Հայաստանում ռուսական ընկերությունների առաջխաղացման և մի շարք այլ հարցերի։ Վերջինիս համար բարենպաստ պայման են հանդիսանում տիեզերքի բնագավառում գործունեություն ծավալող կազմակերպությունների համար ՀՀ օրենսդրությամբ սահմանված հարկային արտոնությունները։

Հանդիպման ավարտին Հայկ Չոբանյանը Դմիտրի Ռոգոզինին հրավիրել է մասնակցելու է 2022 թ. սեպտեմբերի 5-10-ը Հայաստանում անցկացվող Գիտության ու արվեստի «STARMUS» (Stars and Music) 6-րդ միջազգային փառատոնին։

Telegram

Ի՞նչ կանի Ռուսաստանը, եթե Ուկրաինան հարձակվի Դոնբասի վրա

«Առանց Ռուսաստանի ակտիվ աջակցության` Դոնեցկի Ժողովրդական Հանրապետությունը (ԴԺՀ) և Լուգանսկի Ժողովրդական Հանրապետությունը (ԼԺՀ) չեն կարողանա տևական ժամանակ դիմակայել Ուկրաինայի զինված ուժերին»: Սերգեյ Մարժեցկու խոսքով` եթե Մոսկվան պարզապես փակի սահմաններն ու հայտարարի, որ Դոնբասում տեղի ունեցողը ներուկրաինական հարց է, ապա այդ երկու հանրապետությունները կործանման են դատապարտված: Առանցքային հարցը` որքա՞ն կխորանա ռուսական ղեկավարությունը` Դոնեցկին ու Լուգանսկին պաշտպանելու համար:

Հոդվածագիրը հիշեցնում է, որ ուկրաինական հարձակման դեպքում Ռուսաստանի հնարավոր գործողությունների մասին հարցին ի պատասխան` Վլադիմիր Պուտինը դեռևս 2018թ. հայտարարել էր, որ դա շատ ծանր հետևանքներ կունենա ուկրաինական պետության համար:

Հարցադրում է հնչում. «Արդյո՞ք Ռուսաստանը կարող է հաղթել Ուկրաինայի ԶՈՒ-ին ու հասնել Կիև»: Մարժեցկու կարծիքով` այո, սակայն դա շատ թանկ կարժենա ՌԴ-ի համար. մեծ թվով զոհեր ու տեխնիկայի կորուստ, հետագայում` խնդիրներ պարտիզանների հետ և այլն:

Հեղինակի խոսքով` ներկայումս ամենակարևորն այն է, որ Արևմուտքում հանգիստ չեն հետևելու ընթացող լայնածավալ պատերազմին: Ուկրաինա օտարերկրյա զորքեր մտցնելու իրավունքի մասին օրենքն արդեն ընդունված է, այդ պատճառով արշավը Կիևի ուղղությամբ ամենայն հավանականությամբ կավարտվի Արևմտյան, ապա և` Աջափնյա Ուկրաինայի տարածքում ՆԱՏՕ-ի զորախմբի տեղակայմամբ: Այդտեղ արդեն ամեն ինչ կախված կլինի ՌԴ ԶՈՒ-ի շարժունակությունից ու օդադեսանտային ուժերի գործողություններից, որպեսզի հասցնեն առաջինը վերցնել իրենց վերահսկողության տակ: Փաստացի` դա կնշանակի Ուկրաինայի մասնատում: Մարժեցկու կարծիքով` ՆԱՏՕ-ն այդ դեպքում կմոտենա ռուսական սահմաններին թե ընդհակառակը` կհեռանա, քննարկման հարց է:

Հեղինակը նշում է, որ ներկայումս Ռուսաստանն արդեն արևմտյան պատժամիջոցների ներքո է, իսկ այդպիսի ակտիվ հարձակողական գործողությունների դեպքում կարժանանա ավելի խիստ սահմանափակումների: «Հյուսիսային հոսք-2»-ի մասին ընդհանրապես ստիպված կլինի մոռանալ: Մարժեցկին հնարավոր է համարում, որ Կիևը կդադարեցնի ռուսական գազը տարանցումն իր տարածքով, իսկ գները Եվրոպայում կաճեն, ինչի առթիվ սեղմված հեղուկ գազ արտադրող ամերիկյան ընկերությունները բավականին կուրախանան:

Նշվում է, որ Մոսկվան այդպես «ազատորեն» կարող էր գործել 2014-2015թթ.: Հեղինակի խոսքով` 2021թ. նույնպես հնարավոր է, սակայն արդեն շատ թանկ կարժենա, հատկապես եթե ամեն ինչ ստիպված լինի ինքնուրույն անել, առանց տեղական «պրոքսիների»:

Հիշեցնենք, որ վերջին օրերին բազմաթիվ փորձագետներ ահազանգում են, որ Ուկրաինան մեծ ուժեր է կենտրոնացնում Դոնբասի մոտակայքում` պատրաստվելով պատերազմի: Ժամկետ է նշվում ամենաուշը մայիս ամիսը:

Ավելի վաղ հաղորդել էինք, որ Ուկրաինան Թուրքիայից «բայրաքթարներ» է ձեռք բերում և տեղակայում մերձդոնեցկյան շրջաններում:

Նկար` © Валерий Мельников / РИА Новости

Միացեք մեր Telegram ալիքին

Հայաստանը, Ռուսաստանն ու Ադրբեջանը կգույքագրեն փոխադրումների վերաբերյալ պայմանագրերը

Հայաստանի, Ռուսաստանի և Ադրբեջանի համապատասխան մարմիններն իրականացնելու են ԱՊՀ (Անկախ պետությունների համագործակցության) շրջանակներում և երրորդ երկրների հետ կնքված միջազգային պայմանագրերի գույքագրում (ինվենտարիզացիա), որոնք վերաբերում են տարածաշրջանում փոխադրումների իրականացմանը և դրանց նկատմամբ վերահսկողության ապահովմանը:

ՌԴ փոխվարչապետ Ալեքսեյ Օվերչուկը հայտարարել է, որ նման խորհրդատվությունը պրոֆիլային գերատեսչությունում համաձայնեցվել է եռակողմ աշխատանքային խմբի` փետրվարի 27-ին կայացած երրորդ նիստում, որին մասնակցել են երեք երկրների փոխվարչապետերը:

Օվերչուկը նշել է, որ դիտարկվել են փորձագիտական ենթախմբերի հաշվետվությունները երկաթուղային, ավտոմոբիլային, կոմբինացված փոխադրումների, ինչպես նաև փոխադրումների ապահովման, այդ թվում` անվտանգության, սահմանային, մաքսային, սանիտարական, անասնապահական, ֆիտոսանիտարական և վերահսկողության այլ միջոցների վերաբերյալ:

Այդ հարցերի կարգավորման շրջանակներում կողմերի համապատասխան մարմիններին խորհուրդ է տրվել նույնականացնել ԱՊՀ շրջանակներում և երրորդ երկրների հետ կնքված միջազգային պայմանագրերը:

Հայաստանի, Ռուսաստանի և Ադրբեջանի փոխվարչապետերը պայմանավորվել են աշխատանքային խմբի հաջորդ նիստն անցկացնել մարտի 1-ին` կրկին տեսակոնֆերանսի միջոցով:

Միացեք մեր Telegram ալիքին

Հարավային ռազմական օկրուգն «Իսկանդերով» վարժանքներ է կատարել

Ռուսաստանի Դաշնության Հարավային ռազմական օկրուգի (ՀՌՕ) համազորային բանակի 58-րդ հրթիռային միավորումը Հյուսիսային Օսիայում հաջողությամբ ավարտել է զորավարժությունները:

«Իսկանդեր» օպերատիվ-մարտավարական հրթիռային համալիրների հաշվարկները մեկնել են նշանակված վայր, տեղակայվել են անպատրաստ դիրքերում և, ստանալով կոորդինատները, հրթիռների ուսումնական (էլեկտրոնային) արձակմամբ ոչնչացրել են մի քանի հարյուր կիլոմետր հեռավորության վրա գտնվող պայմանական հակառակորդի հրամանատարական կետերն ու հակաօդային պաշտպանության միջոցները:

Հրթիռայինները նաև իրականացրել են հրթիռային համակարգերի ստուգում, նրանց վերբեռնում տրանսպորտային-լիցքավորող մեքենաների կիրառմամբ, կատարել են մեկնարկային դիրքերի բազմանգամյա հերթափոխի խնդիրներ և հետ են մղել պայմանական դիվերսիոն-հետախուզական խմբի հարձակումը:

Նկարը` © ЮВО \ Վարժանքներ` «Իսկանդերով»

Միացեք մեր Telegram ալիքին

Կասպիական նավատորմի ավելի քան 40 ռազմանավեր պատրաստվում են ծով դուրս գալ

Կասպիական նավատորմի ապահովման ավելի քան 40 նավերի անձնակազմեր սկսել են ծով դուրս գալու նախապատրաստական աշխատանքները:

Կասպից ծովում ուսումնական գործողություններին մասնակցելու են «Թաթարստան» և «Դաղստան» հրթիռային նավերը, «Գրադ Սվիյաժսկ», «Ուգլիչ», «Մեծն Ուստյուգ», «Վոլգոդոնսկ», «Մախաչկալա», «Աստրախան» փոքր հրթիռային և հրետանաին նավերը, բազային և մարտարշավային ականազերծիչ նավերը, հրետային ռազմանավակները, մարտարշավային նավաքարշերը, հիդրոգրաֆիկական նավերը, որոնք իրականացնելու են նավերը մարտի նախապատրաստելու և բազայի կազմում արշավի հանձնարարություններ:

Նախապատրաստության ընթացքում նավաստիներն իրականացնելու են ռադիացիոն, քիմիական և կենսաբանական պաշտպանության նավային տարատեսակ վարժանքներ, նավերի կենսունակությունը բարձրացնող, հակաօդային և հակադիվերսիոն պաշտպանական գործողություններ: Նաև մշակվում են ամենօրյա ծառայության կազմակերպման, սպառազինության և մարտական բոլոր մասերի սպասարկման հարցեր:

Մարտական պատրաստության հաջորդ փուլում նախատեսվում է անձնակազմերի տեղակայում ծով դուրս գալու համար, որտեղ նավաստիները պետք է կատարելագործեն ծովային գործողությունների իրականացման հմտությունները և պլանային մարտական վարժություններն ինչպես մեկ նավի, այնպես էլ` նավային հարվածային խմբի կազմում:

Ուսումնական շրջանի ընթացքում Կասպիական նավատորմի ռազմանավերն իրականացնելու են հրթիռային և հրետանային կրակային վարժություններ ծովային, ափային և օդային թիրախների ուղղությամբ:

Միացեք մեր Telegram ալիքին

Արդյո՞ք Ռուսաստանը վախենում է թուրքական ուժից. Pentapostagma

Հունական Pentapostagma պարբերականը նշում է, որ 2020թ. Թուրքիան և Ռուսաստանն այս կամ այն կերպ մասնակցել են երեք հակամարտությունների` Սիրիայում, Լիբիայում և Լեռնային Ղարաբաղում, գտնվելով հակադիր բևեռներում: Շեշտվում է, որ բոլոր դեպքերում Անկարայի գերակայությունն ակնհայտ է եղել, ինչը Մոսկվային պարտադրել է Արցախի դեպքում դիմել արմատական դիվանագիտական որոշման:

Նշվում է, որ դա որոշ փորձագետների առիթ է տվել պնդելու, թե ռուսները տարվա ընթացքում ընդհանուր առմամբ երեք պարտություն են կրել թուրքերից: Ընդ որում` Ռուսաստանի համար ամենացավոտը Սիրիան է, որտեղ Մոսկվան 2015թ. աշնանից լուրջ ներկայություն ունի: Որոշ փորձագետներ, ըստ հունական աղբյուրի, համարում են, որ հենց այդ պատճառով ՌԴ-ն բացահայտ կերպով չի կանգնել Հայաստանի կողքին, և վերջինս պարտվել է Ադրբեջանին:

Թուրքական անօդաչուները, ինչպես նշվում է, իրենց լավ են դրսևորել` տարբեր տարածաշրջաններում հաղթանակներ պարգևելով: Ոմանց կարծիքով` Մոսկվան վախենում է Անկարայի աճող հզորությունից: Հունական պարբերականը հարցադրում է անում. «Արդյո՞ք ռուսները սկսել են վախենալ թուրքերից»: Պատասխանը` «ոչ, դա դեռ չի նշանակում, թե Ռուսաստանն իրեն Թուրքիայից թույլ է համարում ռազմական կամ տեխնոլոգիական հարցերում»:

Տեղի ունեցածի համար բերվում է տրամաբանական բացատրություն. Թուրքիայի ԶՈՒ-երը կարող են տարբեր հակամարտություններում ներգրավված լինել և օգտագործել ռազմականացված խմբավորումներ: Մինչդեռ Ռուսաստանն այդպիսի հնարավորություն չունի, քանի որ նրա վրա լուրջ ճնշում է գործադրվում: Միջազգային իրադրությունը Մոսկվային թույլ չի տալիս «հարվածել բռունցքով»: Այդ պատճառով լավ զինված թուրքերին ու նրանց դաշնակիցներին հաճախ դիմադրում են հին զենքերով զինված ուժերը: Այդպես են կարծում Անկարայում գործող BlueMelange անկախ հետազոտական խմբի վերլուծաբանները:

Ամերիկյան Stratfor վերլուծական կենտրոնի փորձագետ Թոմ Ռենքվիստի խոսքով` Մոսկվան միայն սահմանափակ հարցերի շրջանակներում է լրջորեն վերաբերվում թուրքական անօդաչուների վտանգին:

Նրա կարծիքով` դրոնները չեն կարող փրկել Իդլիբի գրոհայիններին: Մոսկվան մինչ օրս այն չի վերցրել իր վերահսկողության տակ, քանի որ նպատակ ունի նախապես լավ պատրաստել սիրիական բանակը:

BlueMelange-ի մասնագետները նշում են, որ թուրքական անօդաչուներին հիմնականում դիմակայում են հնացած ՀՕՊ համակարգերը, հաճախ` խորհրդային, լավագույն դեպքում` 90-ականներին մոդեռնիզացվածները: Նրանց համոզմամբ` հայերն ավելի քան 1 մլրդ դոլարի տեխնիկա են կորցրել Արցախում: Լիբիայում Bayraktar TB2-ներին հաջողվել է ոչնչացնել ավելի քան մեկ տասնյակ ռուսական «Պանցիր Ս-1» զենիթահրթիռային թնդանոթային համալիր, որոնք Լիբիայի ազգային բանակին էին փոխանցվել ԱՄԷ-ի կառավարության կողմից: Սակայն ՌԴ-ում սխալների ուղղման ուղղությամբ արդեն աշխատանքներ տարվել են:

Ռենքվիստի խոսքով` բազմամակարդակ ՀՕՊ համակարգերի դեպքում դրոնների հասցրած վնասն աննշան կլինի: Stratfor-ի վերլուծաբանը կարևոր է համարել, որպեսզի բոլոր «բացերը» փակ լինեն, և այդ դեպքում դրոնները չեն կարող հաղթանակի գրավական լինել:

Telegram

ՌԴ ՊՆ-ն որոշել է մեծ քանակությամբ կվադրոկոպտերներ գնել բանակի համար

Ուկրաինական աղբուրները հաղորդում են, որ Ռուսաստանի պաշտպանության նախարարությունը որոշել է մեծ քանակությամբ փոքր կվադրոկոպտերներ ձեռք բերել զինված ուժերի համար: Թեթև անօդաչուները նախատեսվում է կիրառել հետախուզության նպատակով: Աղբյուրը նշում է, որ հետախուզական ինքնաթիռատիպ անօդաչուները ռուսական բանակում շուրջ 2 հազարն են: Ձեռք բերվելիք ուղղաթիռատիպ կվադրոկոպտերների քանակը չի նշվում:

Ռուսական աղբյուրները հաղորդում են, որ թեթև կվադրոկոպտերներով նախատեսվում է համալրել ՌԴ ԶՈւ ցամաքային զորքերի հետախուզական վաշտերն ու գումարտակները:

Նշվում է, որ ուղղաթիռանման, թեթև և համեմատաբար մատչելի կոպտերների կիրառման փորձարկումները ռուսական զորքերում իրականացվել են 2019թ.-ից սկսած` հիմնականում Արևելյան ռազմական օկրուգի ստորաբաժանումներում ու զորամասերում: 2020թ. վերջին կատարվել են անօդաչու թռչող սարքերի օգտագործման գնահատում, ըստ որի` փորձարկումները համարվել են հաջողված:

Միացեք մեր Telegram ալիքին

Նիկոլ Փաշինյանը հունվարի 11-ին կմեկնի Մոսկվա. պաշտոնական

ՀՀ վարչապետի մամուլի խոսնակը հաղորդել է, որ Նիկոլ Փաշինյանը հունվարի 11-ին աշխատանքային այցով կմեկնի Ռուսաստանի Դաշնություն:

Հաղորդվում է, որ Մոսկվայում նախատեսված է Հայաստանի Հանրապետության վարչապետ Նիկոլ Փաշինյանի, Ռուսաստանի Դաշնության նախագահ Վլադիմիր Պուտինի և Ադրբեջանի Հանրապետության նախագահ Իլհամ Ալիևի եռակողմ հանդիպումը: Այցի շրջանակում վարչապետը նաև առանձնազրույց կունենա ՌԴ նախագահի հետ:

Մանե Գևորգյանը նշում է, որ եռակողմ հանդիպման նախապես պլանավորված օրակարգը տնտեսական բնույթ ունի, որը վերաբերվում է տարածաշրջանային կոմունիկացիաների բացմանը, միջազգային բեռնափոխադրումների իրականացմանը՝ այդ թվում Հայաստանից դեպի Ռուսաստանի Դաշնություն, Իրանի Իսլամական Հանրապետություն, ինչպես նաև Հայաստանի կենտրոնական հատվածներից Նախիջևանի երկաթուղով դեպի Սյունիքի մարզ: Ադրբեջանական կողմը և հայկական որոշ շրջանակներ անընդհատ շրջանառում են այսպես կոչված «Մեղրիի միջանցքի» թեման, սակայն ինչպես բազմիցս նշվել է՝ նոյեմբերի 9-ի եռակողմ հայտարարության մեջ չկա ոչ Մեղրի, ոչ էլ Հայաստանի տարածքով միջանցք ստեղծելու մասին որևէ դրույթ:

Վարչապետի մամուլի խոսնակն հայտարարել է, որ հայկական կողմի համար, սակայն, անկյունաքարային և սկզբունքային է գերիների վերադարձի, ադրբեջանցիների թիկունքում մնացած մեր զինվորների որոնողափրկարարական աշխատանքների, զոհվածների մարմինների հայտնաբերման, անհետ կորածների ճակատագիրը պարզելու խնդիրը: Առանց այս հարցերի լուծման կամ էական առաջընթացի, Գևորգյանի խոսքով, չափազանց դժվար կլինի տնտեսական օրակարգի արդյունավետ քննարկումը և հայկական կողմը այս խնդրի քննարկումը համարում է մոսկովյան հանդիպման առանցքային թեմաներից մեկը:

Ընդգծվում է, որ Մոսկվայում Ղարաբաղի հարցի կամ տարածքային որևէ հարցի լուծմանը վերաբերվող փաստաթղթի ստորագրում չի նախատեսվում: Գևորգյանը նշում է, որ եթե հանդիպման ընթացքում օրակարգային հարցերի, այսինքն՝ տնտեսական թեմաների, գերիների փոխանակման, անհետ կորածների հարցի շուրջ հնարավոր լինի հասնել համաձայնությունների, հնարավոր է հանդիպման արդյունքների վերաբերյալ համատեղ հայտարարության ստորագրում:

ՌԴ ՊՆ-ն հայտնել է, թե 2021թ. ինչ սպառազինությամբ է համալրելու Օդատիեզերական ուժերը

Ռուսաստանի Պաշտպանության նախարարությունը հաղորդել է, որ 2021թ. երկրի Օդատիեզերական ուժերը նախատեսում է համալրել նոր սպառազինությամբ:

Նշվում է, որ ՌԴ ՕՏՈւ-ի առաջին գունդն ընթացիկ տարում կստանա նորագույն Ս-350 «Վիտյազ» (С-350 “Витязь”) զենիթահրթիռային համալիրներ: Բացի այդ` ռազմական ղեկավարությունը որոշել է զորքերը համալրել նաև Ս-400 և «Պանցիր-Ս» (“Панцирь-С”) զենիթահրթիռային համալիրների երկուական գնդերով:

Նախորդ տարի Ռուսաստանի Օդատիեզերական ուժերին են տրամադրվել 4 միավոր Ս-400 և 24 միավոր «Պանցիր-Ս»: Համալիրները տրամադրվել են Սվերդլովսկի, Հարավսախալինյան և Սամարայի մարզերի հակաօդային պաշտպանության ստորաբաժանումներին:

Միացեք մեր Telegram ալիքին

Ռուսաստանի, Հայաստանի և Ադրբեջանի անվտանգության ծառայությունների ղեկավարները հանդիպել են

Ռուսաստանի Դաշնության անվտանգության դաշնային ծառայության տնօրեն Ալեքսանդր Բորտնիկովի նախաձեռնությամբ դեկտեմբերի 28-ին Մոսկվայում տեղի է ունեցել եռակողմ հանդիպում ՀՀ ազգային անվտանգության ծառայության և Ադրբեջանի անվտանգության պետական ծառայության տնօրենների միջև:

Հայաստանի ԱԱԾ հաղորդմամբ՝ հանդիպման ընթացքում քննարկվել են մի շարք անհրաժեշտ հարցեր, այդ թվում՝ նաև գերիների փոխանակման և անհետ կորածների որոնողական աշխատանքներին վերաբերող:

Հանդիպման արդյունքում ձեռք են բերվել նաև պայմանավորվածություններ տարբեր ուղղություններով աշխատանքների իրականացման վերաբերյալ:

Ադրբեջանական գազը և Բուլղարիայի դրժումը «թուրքական հոսքը» չեն դադարեցնի

Չնայած ծանր պատժամիջոցներին՝ Թուրքիայով և Բուլղարիայով Եվրոպա հասնող ռուսական գազատարն ամեն դեպքում գործարկվել է: Սակայն ներկայումս գազատարը մի շարք խնդիրներ ունի, ընդ որում՝ ոչ միայն ԱՄՆ-ի պատճառով:

Ադրբեջանական գազի հետ մրցակցությունն առավել սրանում է հատկապես համավարակի առաջացրած ճգնաժամի, ինչպես նաև Եվրոպայում ածխաջրածնի պահանջարկի նվազման պատճառով: Դրանով պայմանավորված՝ «Թուրքական հոսքի» հզորության կիրառումը հապաղում է: Սակայն այդ բոլոր խնդիրները ժամանակավոր բնույթ են կրում, և Ռուսաստանն ունի խնդիրների լուծման բոլոր գործիքները:

Բուլղարական ուխտադրժությունը

«Թուրքական հոսքի» գործարկման շնորհիվ բալկանյան պետությունն ունի գազային հանգույց դառնալու բոլոր հնարավորությունները: Բայց, այդուհանդերձ, Սոֆիան չի շտապում Ռուսաստանից կապույտ վառելիք գնել: Ավելին, հունվարի 1-ից Բուլղարիայի ներքին սպառման գազի 30%-ն ապահովելու է Ադրբեջանի գազատարը: Բուլղարիան և SOCAR-ը 25 տարով պայմանագիր են կնքել տարեկան 1 մլրդ խմ մատակարարելու վերաբերյալ: Ընդ որում՝ «Գազպրոմը» Սոֆիային 40% զեղչ է առաջարկել, որպեսզի ինչ-որ կերպ լցնի կիսադատարկ «Թուրքական հոսքը»:

Խնդիրն այն է, որ այսօր ադրբեջանական գազն ավելի մատչելի է և կորոնաճգնաժամի պատճառով՝ շահավետ: Սակայն շուկայի վերականգնումից հետո ռուսական գազի գինը կրկին կդառնա շահագրգռող: Ադրբեջանի հետ գործարքն ապահովում է Բուլղարիայի պահանջարկի ընդամենը 1/3-ը: Մյուս մասը, հավանաբար, կբավարարվի ռուսական գազով:

Ցածր գինը կփրկի նոր գազատարը

«Թուրքական հոսքի» հզորությունը տարեկան 31,5 մլրդ խմ է: Ներկայումս, երբ աշխարհում սպառումն էականորեն նվազել է համընդհանուր սահմանափակումների և երկու տաք ձմեռների պատճառով, ամբողջական ծավալն ապահովելն իրատեսական չէ: «Գազպրոմում» հրաշալի հասկանում են այդ խնդիրը և արդեն պատրաստվում են լուծման համար միջոցառումներ ձեռնարկել:

Ներկայումս բանակցություններ են ընթանում թուրքական կողմի հետ՝ «վերցրու կամ վճարիր» պայմանագրերի շրջանակներում քվոտաների նվազման ուղղությամբ: Ի սկզբանե նախատեսվել է, որ տարեկան շուրջ 15 մլրդ խմ գազ կսպառի Թուրքիան, սակայն 2020թ. արդյունքներով՝ կազմել է 9 մլրդ:

Ռուսական ընկերությունն ունի խնդրի լուծման մի քանի տարբերակ: Վաղ թե ուշ՝ գազի սպառումն աճելու է բնական ճանապարհով, իսկ գինը կբարձրանա մինչև ստանդարտ նիշը: Սակայն դա ժամանակ կխլի: «Գազպրոմը» նաև կարող է օգտագործել դեմփինգի (ցածր գնի) քաղաքականությունը՝ շուկայից դուրս մղելով սեղմված գազը և Միջին Ասիայի մրցակիցներին: Այդ գործիքը նոր-նոր է սկսել կիրառվել, բայց սպասվում է, որ շուտով այն լիովին կաշխատի, և ադրբեջանական գազն արդեն կզիջի «Թուրքական հոսքին»:

Միացեք մեր Telegram ալիքին