Դոնբասում իրավիճակը սրվում է. «Սպասողական վիճակ է»

Լուգանսկի Ժողովրդական Հանրապետությունում (ԼԺՀ, Դոնբաս) վերջին օրերին ռազմական իրադրությունը սրված է. ուկրաինացի զինվորականները տարբեր զինատեսակներից կրակ են բացում շփման գծի հատվածում գտնվող շրջանների վրա, ընդ որում` նաև ցերեկային ժամերին: Մարտի 10-ին կրակ է բացվել Զոլոտոյե-5 (Միխայլովկա) բնակելի գյուղի ուղղությամբ, որտեղ գործում է նաև դպրոց:

Հաղորդվում է, որ ուկրաինական ուժերը կիրառել են ծանր հրետանի, ականանետեր, հրաձգային զենքեր և նռնականետեր: Շփման գծի երկայնքում գտնվող գյուղերի խաղաղ բնակչությունն ապաստարաններում է թաքնվել, ԼԺՀ-ի ժողովրդական միլիցիայի մեկ զինծառայող է զոհվել, մեկը` վիրավորվել: Խոցվել է ուկրաինական զինուժի մեկի միավոր ՀՄՄ-2: Որոշ հատվածներում ուկրաինական կրակակետերը ճնշվել են:

Տեղի բնակիչներից մեկը նշել է, որ հիմնական թիրախը պաշտպանական դիրքերն են, բնակելի համայնքների վրա ծանր տեխնիկա չի կիրառվում, սակայն ներկայումս իրավիճակն աստիճանաբար վատթարանում է: Նրա խոսքով` բոլորը սպասողական վիճակում են:

Հաղորդվում է, որ իրավիճակի սրման պայմաններում Ուկրաինա է ժամանել ՆԱՏՕ-ի ցամաքային զորքերի միացյալ հրամանատարության պատվիրակությունը` ՆԱՏՕ-ի ցամաքային զորքերի հրամանատար, գեներալ-լեյտենանտ Ռոջեր Քլությեի ղեկավարությամբ:

Հիշեցնենք` փորձագետներն ահազանգում են, որ Ուկրաինան պատրաստվում է առաջիկա շաբաթների ընթացքում լայնածավալ ռազմական գործողություններ սանձազերծել Դոնբասի դեմ: Ըստ որոշ տեղեկությունների` հնարավոր ժամկետներ են մարտի 15-ը, մարտի վերջ-ապրիլի սկիզբը կամ մինչև մայիս:

Նկարը` © Reuters

Միացեք մեր Telegram ալիքին

Ուկրաինան թուրքական բայրաքթարներ է կենտրոնացնում Դոնբասի մոտ

Փորձագետները կանխատեսում են, որ Ուկրաինան Դոնբասի կամ նույնիսկ Ղրիմի վերադարձման համար կկիրառի բայրաքթարներ. 6 միավոր արդեն տեղակայվել է Կրամատորսկում:

Տեղեկություն է տարածվել, որ ուկրաինական զինված ուժերը Դոնբասի «Միացյալ ուժեր» գործողության իրականացման գոտում թուրքական արտադրության հարվածային Բայրաքթար ՏԲ2 (Bayraktar TB2) անօդաչու թռչող սարքեր են տեղակայել: Հաղորդվում է, որ Կրամատորսկ տեղափոխված ԱԹՍ-ները 6-ն են: Հավելյալ տեղեկություններ կամ հաստատում առայժմ առկա չէ:

Բայրաքթարներն Ուկրաինայի կողմից Դոնբասի կամ նույնիսկ Ղրիմի վերադարձման համար կիրառելու կանխատեսումներ որոշ փորձագետներ արել են՝ հաշվի առնելով դրանց լայնածավալ օգտագործումն Ադրբեջանի կողմից՝ ընդդեմ Արցախի: Նշվում է, որ ուկրաինացի ռազմական տեսաբանները հայ ժողովրդի դեմ օգտագործված այդ օրինակը «հաջողված փորձարկում» են համարում:

Կիևի կողմից հակամարտության իր գոտում նշված ԱԹՍ-ների կիրառումը լիովին հնարավոր է համարվում՝ հաշվի առնելով նրա սերտ հարաբերություններն Անկարայի և Բաքվի հետ: Հիշեցնենք՝ հոկտեմբերին (Արցախյան պատերազմի թեժ շրջանում) Ուկրաինայի նախագահ Վլադիմիր Զելենսկին մեկնել էր Թուրքիա: Այցի ընթացքում երկու երկրների միջև ստորագրվել էր ռազմական համագործակցության մասին համաձայնագիր:

Բայրաքթարներն Ուկրաինայի ԶՈՒ-երում են ընդգրկվել դեռ 2019թ. մարտին: Ուկրաինական Ուկրսպեցէքսպորտ (Укрспецэкспорт) պետական ընկերությունը և թուրքական Բայքար Դիֆընս (Baykar Defence) ընկերությունը նախատեսում են նաև թուրքական մեկ այլ՝ Աքընջը (Akıncı) անօդաչուների համատեղ արտադրություն ձեռնարկել:

Հավելենք, որ Արցախյան պատերազմում հայկական կողմը ոչնչացրել է թշնամու ավելի քան 260 ԱԹՍ, որոնցից շուրջ 2 տասնյակը՝ Բայրաքթար: Սա տվյալ ԱԹՍ-ների ոչնչացման մինչ օրս ամենամեծ թիվն է: Դրանք կիրառվել են նաև Սիրիայում, Լիբիայում, Իրաքում, սակայն ամենաշատն Արցախում են խոցվել:

Միացեք մեր Telegram ալիքին

Անկարան չի ճանաչում և չի ճանաչելու Ղրիմի անեքսիան. Թուրքիայի ՊՆ

Կիևում կայացել է Թուրքիայի և Ուկրաինայի պաշտպանության նախարարների հանդիպումը, քննարկվել են ռազմական համագործակցության հարցերը:

© Bedrettin/tw / Ձախ կողմում՝ Հուլուսի Աքար, աջ կողմում՝ Անդրեյ Տարան

Թուրքիայի ազգային պաշտպանության նախարար Հուլուսի Աքարը Կիևում ուկրաինացի գործընկերոջ հետ համատ մամուլի ասուլիսի ժամանակ հայտարարել է, որ Թուրքիան հարգում է Ուկրաինայի տարածքային ամբողջականությունը և կոչ է անում բարեկամ երկրի տարածքում առկա խնդիրները կարգավորել խաղաղ և դիվանագիտական ճանապարհով:

Աքարը նշել է, որ Անկարան պատրաստ է այդ ուղղությամբ ցուցաբերել անհրաժեշտ աջակցությունը: Նա նաև բարձր է գնահատել ԵԱՀԿ հատուկ մոնիթորինգային առաքելության ջանքերը, որը, «թեև չի կարողացել հասնել հակամարտության լիարժեք կարգավորմանը, մեծ ներդրում է ունեցել լարվածության թուլացման գործում»:

Թուրք նախարարն ընգծել է, որ Թուրքիան չի ճանաչել և մտադրություն չունի ճանաչել Ղրիմի անեքսիան:

Ուկրաինայի պաշտպանության նախարար Անդրեյ Տարանը շնորհակալություն է հայտնել թուրք գործընկերոջ՝ Ուկրաինայի ինքնիշխանության և տարածքային ամբողջականության պահպանման հարցում աջակցության համար:

Երկու երկրների պաշտոնյաները քննարկել են պաշտպանության բնագավառում համագործակցության ընդլայնման հարցերը: Մասնավորապես՝ մեծ նշանակություն է հաղորդվել պաշտպանական ընկերությունների միջև համագործակցության անհրաժեշտությանը:

Հիշեցնենք, որ թուրքական երկու ընկերություն արդեն պատրաստ են բանակին հանձնել տեղական արտադրության առաջին թևավոր հրթիռը՝ նախատեսված ծովային գործողությունների համար:

Telegram

Ուկրաինայում հայտարարել են Ռուսաստանի դեմ պատերազմի պատրաստության մասին

Ուկրաինայի ռազմական նավատորմի հրամանատար Ալեքսեյ Նեիժպապան հայտարարել է, որ ռազմածովային ուժերը մտադիր են վերադարձնել Ղրիմը:

Նկարը՝ © РИА Новости, Стрингер, «Գեթման Սաղայդաչնիյ» ֆրեգատը

Ուկրաինայի ռազմական նավատորմի հրամանատար փոխծովակալ Ալեքսեյ Նեիժպապան հայտարարել է, որ երկրի Ռազմածովային ուժերը (ՌԾՈւ) պատրաստվում են Ռուսաստանի դեմ լայնածավալ ռազմական գործողությունների: Նրա խոսքով՝ Ուկրաինան մտադիր է վերադարձնել Ղրիմը: Փոխծովակալն ընդգծել է, որ Ռուսաստանի դեմ պատերազմը մեծ կորուստներ է պատճառելու՝ թե զինվորականների, թե քաղաքացիական բնակչության շրջանում:

Նեիժպապան նշել է, որ Կիևում սպասում են ռուսական բանակի հարձակմանը Խերսոնեսի շրջանում, որի նպատակը Դնեպրի ջրերը դեպի Ղրիմ բաց թողնելն է: Փոխծովակալի խոսքով՝ ուկրաինական ՌԾՈւ ստորաբաժանումները պատրաստվում են այդպիսի գործողությունների: Գաղտնիքները չբացելով՝ հավելել է, որ «Նեպտուն» հրթիռային համալիրը հնարավոր կլինի կիրառել բուն Ուկրաինայից՝ ընդհուպ մինչև Սևաստոպոլ հեռահարությամբ: Նեիժպապան հայտարարել է, որ առճակատման ազդանշանը կլինի Ռուսաստանի փորձը՝ Հյուսիսղրիմյան ջրանցքը թերակղզում վերականգնելու փորձը:

Նախկինում Ուկրաինան Ղրիմի խմելու ջրի պահանջակի 85%-ն ապահովել է Դնեպրից հոսող Հյուսիսղրիմյան ջրանցքով: Սակայն Ղրիմը Ռուսաստանին միանալուց հետո ջրանցքի հոսքն ամբողջությամբ դադարեցվել է: Ուկրաինացի քաղաքական գործիչները հրաժարվում են վերականգնել ջրամատակարարումը դեպի թերակղզի, սակայն պարբերաբար հայտարարում են Հյուսիսղրիմյան ջրանցքը զավթելու ռուսական ծրագրերի մասին: Նշվում է, որ խմելու ջրի աղբյուրներ իրականում առկա են:

Վերջին շրջանում ուկրաինական ՌԾ ուժերը լուրջ խնդիրների առաջ են կանգնած: Հին նավերն աստիճանաբար շարքից դուրս են գալիս, իսկ նորերի համար միջոցները չեն բավարարում: Կիևն ակտիվորեն գնում է օտարերկրյա դուրսգրված նավերը: Նախորդ տարվա սեպտեմբերին ԱՄՆ Ծովափնյա անվտանգությունը Կիևին է փոխանցել 2 միավոր դուրսգրված հսկիչ նավեր՝ Drummond (WPB-1323) և Cushing (WPB-1321), որոնք կառուցվել են դեռ 1988թ.: ԱՄՆ-ը մտադրություն է հայտնել Ուկրաինայի ՌԾՈւ-ին փոխանցել ևս 2 այդպիսի նավ:

REGST-ը՝ Telegram-ում

Ուկրաինան արբանյակներով կհետևի Ղրիմում ռուսական գործողություններին

Արբանյակային տեղեկությունների փոխանակման համար համաձայնություն է կնքվել 19 երկրների հետ: Մատնանշվում են հատկապես ամերիկյան WorldView-1, WorldView-2 և ֆրանսիական Pleiades արբանյակները:

Ուկրաինան 19 երկրների հետ համաձայնություն է կնքել՝ արբանյակային տվյալների փոխանակման վերաբերյալ: Հաղորդվում է, որ Արևմուտքի երկրների կողմից տրամադրված տիեզերական սարքավորումներն օգտագործվելու են Ղրիմում Ռուսաստանի գործողություններին հետևելու նպատակով:

Ստացված տվյալների օգնությամբ ուկրաինական զինվորականները կարողանալու են արձանագրել «հակառակորդի կազմն ու տեղակայման վայրը», հայտնաբերել ինժեներական արգելանքները, բացահայտել ռազմատեխնիկայի նոր նմուշները և այլն:

Հնարավոր է համարվում մասնավորապես ամերիկյան WorldView-1-ի և WorldView-2-ի, ինչպես նաև ֆրանսիական Pleiades-ի տվյալների տրամադրումն ուկրաինական իշխանություններին:

Ամերիկյան առևտրային բոլոր արբանյակները երկակի նշանակության սարքավորումներ են, քանի որ ընկերություններն ունեն պետական պայմանագրեր, ըստ որոնց՝ ստացված տեսատեղեկատվության մեծ մասը փոխանցվում է ԱՄՆ-ի Աշխարհատարածական տեղեկատվության ազգային գործակալությանը, որը գործում է Միացյալ Նահանգների ազգային անվտանգության և պաշտպանության շրջանակներում:

Հաղորդվում է, որ ռազմական փորձագետները տիեզերական հետախուզությունը համարում են առանցքային, օրվա ցանկացած ժամին, անկախ եղանակային պայմաններից, հավաստի տեղեկություն ստանալու առավել հուսալի աղբյուր: Դրա օգնությամբ շրջաններն ու օբյեկտները կարող են հետախուզվել՝ անկախ աշխարհագրական դիրքից:

Նկարը՝ © AP (Ղրիմ, Սակի օդանավակայան, ՌԴ ՊՆ 43-րդ ավիացիոն գունդ, 2016թ., Pleiades արբանյակից)

Բաժանորդագրվեք մեր Telegram ալիքին

Համատեղ հայտարարություն ԵԽԽՎ-ում՝ ընդդեմ Ռուսաստանի

Վրաստանի, Ուկրաինայի, Էստոնիայի, Լատվիայի և Լիտվայի պատվիրակությունները ԵԽԽՎ-ում ընդդեմ Ռուսաստանի համատեղ հայտարարություն են պատրաստել:

Եվրոպայի խորհրդի խորհրդարանական վեհաժողովում ներկայացված համատեղ հայտարարությունը վերաբերում է Ռուսաստանի վերադարձին այդ կառույց, ինչպես նաև Մոսկվայի կողմից Վրաստանի և Ուկրաինայի նկատմամբ սպառնալիքներին: Նշված հինգ երկրները հանդես են գալիս ՌԴ-ի ձայնի իրավունքի վերականգնման դեմ և կարծում են, որ Ռուսաստանի հեռացման հիմքերն անփոփոխ են:

Վրաստանի, Ուկրաինայի, Լիտվայի, Լատվիայի և Էստոնիայի պատվիրակությունները սեպտեմբերի 30-ին հրաժարվել են մասնակցել ԵԽԽՎ աշնանային նստաշրջանի բացմանը՝ որպես բողոք և ի աջակցություն Ուկրաինայի: Մյուս նիստերին պատվիրակությունները մասնակցում են:

Վրաստանի եվրոպական ինտեգրացիայի կոմիտեի ղեկավար Թամար Խուլորդավայի խոսքով՝ Ռուսաստանին ԵԽԽՎ վերադարձնելու որոշումն անհիմն է:

Փաստաթղթում նշվում է, որ Եվրոպայի խորհուրդը 70 տարի պաշտպանել է միլիոնավոր մարդկանց իրավունքները և խստորեն պահպանել է այն արժեքները, որոնց համար ստեղծվել է Խորհուրդը: Սակայն 2019թ. հունիսին իրավիճակը փոխվել է: Ամառային նստաշրջանի 2 292 բանաձևով ռուսական պատվիրակությանը վերադարձվել է ձայնի իրավունքը և այլ լիազորություններ:

Դրանով ԵԽԽՎ-ն աչք է փակել Ռուսաստանի կողմից իր հարևանների նկատմամբ իրականացվող մարդու իրավունքների խախտումների, տարածքների օկուպացիայի և անեքսիայի, ապօրինի ձերբակալությունների վրա,- նշվում է համատեղ հայտարարությունում:

Փաստաթղթում խոսվում է նաև Հարավային Օսիայի, Վրաստանից օկուպացրած տարածքներում իրականացված ընտրությունների մասին:

Այս հինգ երկրների պատվիրակությունները պայմանավորվել են ԵԽԽՎ-ում ստեղծել Բալտիկ պլյուս մշտական խումբ, որի նպատակը Ռուսաստանի կողմից Ղրիմի անեքսիայի չճանաչման քաղաքականությունն է, Արևելյան Ուկրաինայի, Վրաստանի և Մոլդովայի, Ղրիմի օկուպացիայի քննադատությունը: Խմբի հաջորդ նիստը նախատեսվում է անցկացնել Կիևում:

Միաժամանակ, Ֆրանսիայի նախագահը հայտարարել է, որ Ռուսաստանի վերադարձը ԵԽԽՎ չի նշանակում, թե ԵԽ-ում երկակի ստանդարտներ կան:

Այդ որոշումը չի հակասում Վրաստանում, Կովկասում, Մերջդնեստրում սառեցված հակամարտություններին վերջ դնելու մեր վճռականությանը:

Էմանուել Մակրոնի խոսքով՝ սա Ռուսաստանին իր պարտականությունները կատարելուն ուղղված պարտադրանք է, այլ ոչ թե մեղմություն:

Էրդողանի երկակի խաղը, Զելենսկին ու Ղրիմը

Թուրքիայի նախագահ Ռեջեփ Թայիփ Էրդողանը Ուկրաինայի նախագահ Վլադիմիր Զելենսկիի հետ համատեղ մամուլի ասուլիսի ժամանակ հայտարարել է, որ Անկարան չի ճանաչում Ղրիմի միացումը Ռուսաստանին:

Նա ընդգծել է, որ Թուրքիան պաշտպանում է Ուկրաինայի անկախությունը: Ղրիմի թաթարները թուրք-ուկրաինական հարաբերություններում կարևոր դերակատարում ունեն, ուստի, Էրդողանի խոսքով, թուրքերի համար Ղրիմի թաթարների իրավունքների պաշտպանությունն ու նրանց ազգային ինքնության պահպանումն առաջնային նշանակություն ունեն:

Ղրիմի թաթարներ

Ղրիմի խորհրդարանի պատգամավոր Վլադիսլավ Գանժարան նշել է, որ Թուրքիայի նախագահի հայտարարությունը՝ Ղրիմը Ռուսաստանի մաս չճանաչելու մասին, հիասթափեցնում է և խոսում Ուկրաինայի հետ Էրդողանի խաղի մասին:

Գանժարան հայտարարել է, որ Էրդողանի հայտարարություններում բազմիցս է արտահայտվել երկակի ստանդարտների քաղաքականության կիրառումը: Նրա խոսքով՝ եթե Անկարան ցանկանում է դառնալ Մոսկվայի ռազմավարական դաշնակիցը, ապա պետք է ընդունի, որ Ղրիմը Ռուսաստանի անբաժան մասն է:

Ղրիմը Ռուսաստանի կազմն է անցել 2014թ. թերակղզում անցկացված հանրաքվեի արդյունքում, որտեղ 95 տոկոս ձայների մեծամասնությամբ Ղրիմը դարձավ ՌԴ մարզ: Վլադիմիր Պուտինը նշել է, որ թերակղզու հարցը մեկընդմիշտ փակված է, իսկ Էրդողանի հայտարարությունից հետո ռուս մի շարք պաշտոնյաներ հայտարարել են, որ Ղրիմը Ուկրաինայի կազմ կվերադառնա միայն այն դեպքում, երբ Ռուսաստանն այլև գոյություն չունենա: